ពិព័រណ៍ | ម៉ូត និងទឹកអប់

>> ស្វែងយល់ពីកម្មវិធីផ្សេងៗក្នុងវដ្ត «ជំនោរអាស៊ី» <<

សូមអញ្ជើញមកស្រង់ក្លិនទឹកអប់ម៉ូតទាន់សម័យនៅវិទ្យាស្ថានបារាំងនៅកម្ពុជា! ជាមួយនឹងការចាប់ផ្ដើមរដូវកាលវប្បធម៌ទី៣នៃ«ជំនោរអាស៊ី» វិទ្យាស្ថានបារាំងសូមបង្ហាញពិព័រណ៍ថ្មីមួយ «ម៉ូត និងទឹកអប់»!

ទឹកអប់ និងម៉ូតត្រូវបានផ្សារភ្ជាប់ជាមួយគ្នាតាំងពីដើមសតវត្សទី២០មកម្ល៉េះ ហើយបច្ចុប្បន្នគ្មានមួយណាខ្វះមួយណាបានឡើយ។ ប៉ូល ព័ររ៉េ បាននិយាយទៅកាន់អតិថិជនរបស់ខ្លួនថា ៖ «រ៉ូបរបស់អ្នកនាងស្អាតណាស់ ប៉ុន្តែទឹកអប់ខ្ញុំមួយតំណក់នៅលើភ្លីរ៉ូបអ្នកនាង នឹងធ្វើឱ្យរ៉ូបអ្នកនាងអស្ចារ្យតែម្ដង»។ ចាប់ពីពេលនោះមក ទឹកអប់ហាងសម្លៀកបំពាក់ម៉ាកប្រណីតៗក៏បានចូលខ្លួនបំពេញផ្នែកមួយនៃពិភពម៉ាឃីតធីង។ ឆាណែល កាល់វីនគ្លីន ឌីអរ អ៊ីវសាំងឡូរ៉ង់…គ្រប់ម៉ូតល្បីៗទាំងអស់បានរកឃើញក្លិនក្រអូបពិសេសផ្ទាល់របស់ខ្លួន ហើយទឹកអប់ក៏ត្រូវបានផលិតឡើងដូចជាគ្រឿងតុបតែងលម្អដ៏ចាំបាច់មួយ ពោលគឺរូបរាងមនុស្សមិនទាន់មកដល់ផងក្លិនក្រអូបមកដល់មុនរួចទៅហើយ។

ពិព័រណ៌«ម៉ូត & ទឹកអប់» ពីថ្ងៃ ២ មិថុនា ដល់ ២២ តុលា នៅវិទ្យាស្ថានបារាំង នឹងបង្ហាញទំនាក់ទំនងយ៉ាងជិតស្និទ្ធរវាងម៉ាកសម្លៀកបំពាក់ល្បីៗ និងធាតុផ្សំនៃក្លិនក្រអូប ហើយនឹងតាំងបង្ហាញម៉ាកជាង១០ដែលល្បីឈ្មោះនៅក្នុងការបង្កើតទឹកអប់។ សូមអញ្ជើញមកអបអរការបើកសម្ពោធចាប់ពីម៉ោង៦និង៣០នាទីល្ងាច ជាមួយនឹងការបង្ហាញថ្វៃដីធ្វើម្ហូបរបស់ឡៃ សៃតូ ដែលល្បីឈ្មោះដោយសារម្ហូបដ៏មានសិល្បៈរបស់នាង និងបន្តដោយការប្រគំតន្ត្រីរបស់ក្រុម KlapYaHandz ដោយមានវត្តមានរបស់ស្រីល័ក្ខ និងវិទូ!

នៅក្នុងឱកាសនេះ ទឹកអប់ម៉ាក«In the arboretum» បង្កើតឡើងសម្រាប់ខួប៣០ឆ្នាំរបស់វិទ្យាស្ថានបារាំងនៅកម្ពុជា ក្រោមកិច្ចសហការរវាងសិល្បករ ពេជ្រ សុភាព ជាមួយនឹងអ្នកជំនាញខាងទឹកអប់ ឈ្មោះវីយ៉ូឡែន កូឡា ដែលផលិតដោយចលនារប្បធម៌ឃានវិញ្ញាណ  Nez នឹងត្រូវដាក់តាំងបង្ហាញ។

ម៉ាកល្បីៗ ៖ Chanel, Rochas, Christian Dior, Givenchy, Yves Saint Laurent, Thierry Mugler, Kenzo, Jean-Paul Gaultier.

ដៃគូសហការជាមួយ le mouvement culturel olfactif Nez និង Cirva (មជ្ឈមណ្ឌលស្រាវជ្រាវកែវ) ក្រុងម៉ាកសី។